Meghalaya-in oxygen bed siam belh dawn
Meghalaya chief minister Conrad K Sangma chuan state-in hri leng thawh hnihna a tawrh mekah, hri kaite enkawlna tur oxygen supported bed chu kar hnih chhungin 1,000-ah tihpun a ni dawn tih a sawi.
Thawhṭanni khan hripui vanga thi mi 16 awmin, an state-a Covid-19 thihpui hi mi 336 an awm tawh. Hri kai enkawl mek, active case 4,915 an awm bawk.
Media mite a kawmnaah, CM Sangma chuan thla hmasa khan sorkar chuan oxygen bed 350 chu 750-ah a tihpun tawh thu a sawi a, "A dang pawh siambelh zel a ni dawn a, kar hniha oxygen supported bed hi 1,000 siam hman tum a ni," a ti.
Shillong Civil Hospital, Ganesh Das Hospital leh RP Chest TB Hospital-a oxygen generation plant siam pawh ngawrh taka thawh mek niin, zawhfel a ni thuai dawn tih Sangma chuan a sawi. Heng bakah hian Tura, Jowai leh Nongpoh hospital-ah pawh siam mek a ni bawk.
Sangma chuan sorkar Shillong khawpui chhung hmun hrang hrangah corona care centre a siam dawn tih a sawi a, "Hri kai zinga damdawi-ina dah luh kher ngai lote awmna tur hi siam belh zel tum a ni a, a hmasa berah khum 300 awm theihna siam phawt a ni ang," a ti.
Hri kai an pun chungchangah hemi atan hian an lo inbuatsaih lawk tih CM chuan a sawi a, "Mahse kan pun belh zel a nih chuan hospital khum leh oxygen cylinder siam belh zel mah ila kan indaih lo thuai dawn a ni," tiin mitinte chu sorkarin kaihhruaina a siamte zawm ṭha turin a ngen a, hei hi hri darh tur dan chahna pawimawh ber a nih thu a sawi.