Dimapur-ah Covid-19 hospital siam dawn

Nagaland chief minister Neiphiu Rio chuan an state-a hri kai an pun chhoh zel avangin Dimapur-ah khum 176 awmna Covid-19 hospital siam a ni dawn tih a sawi.

CM chuan Thawhlehnia state mipuite hnenah thuchah a sawiah hemi chungchang hi sawiin, kar reilote hnuah Covid-19 hospital hi peih fel a ni dawn tih a sawi a, emergency care facility pawh siam a ni dawn tih a sawi bawk.

Rio chuan Covid-19 hri leng thawh hnihna chu an state-in a tuar na hle tih sawiin, hri kai an pung chak a, thihpui pawh eng emaw zat an awm tawh a ni, a ti. Hun khirh tak an hmachhawn mekah state mipuite chu thawhhona ṭha tak nei tura sawmin, "Kan state tan hian kan theihna zawng zawng kan hman a, kan hmaa hun khirh tak kan hmachhawn tur beih letna atana kan thawhho a ngai a ni," a ti. State chhunga pawl hrang hrang, kohhran pawl, tribal pawl, civil society organisation, political party leh NGO zawng zawngte chu state mipuite tan, 'Team Nagaland' member ni vek turin a sawm.

Chief Minister chuan state mipuite himna turin a kaihhruai sorkar chuan theihtawp a chhuah zel dawn tih a sawi.

Thawhlehni vek khan CM Rio kaihhruai high-powered committee (HPC) on Covid-19 chuan district hrang hranga hri leng dinhmunte thlirin, District Task Force (DTF) aiawhte video conference an neihpui bawk. HPC chuan DTF-te hnenah an mamawh dan azirin fund pek belh zel a ni dawn tih a sawi a, sorkar chuan DTF-ten an district mamawh an thlente pawh a theih angin a pe dawn a ni, a ti.

Lockdown pawtsei maithei
CM Rio chuan an state dinhmun thlirin lockdown puan mek chu kar khat dang pawhsei a ngai maithei tih a sawi bawk.

Rio chuan, "Lockdown puan hi mipuite tana buaithlakin hnathawhna leh eizawnna kawngah harsatna a thlen a, mahse hri a darh chho zel a nih chuan pawhsei a lo ṭul a nih pawhin hemi atan kan inbuatsaih lawk a ngai a ni," a ti. Mipuite chu an himna atana lockdown dante bawhchhe lo turin a ngen a, fimkhur em em a awm turin a ngen.

Hri leng dona kawnga a hmatawngtu, healthcare leh frontline worker-te chungah lawmthu sawiin, Rio chuan chhun leh zana rim taka an thawhnate chu an hriatipui a, midangte himna atan an nunna thapin an thawk a ni, a ti. Mipuite pawh thawktute chhawk zangkhai zawng leh, an tana harsatna thlen lo tura thuawih turin a chah.