Meghalaya leh Assam CM-ten meeting nei
Meghalaya leh Assam chief minister-te chuan Thawhlehni khan video conference hmangin meeting an nei a, hri leng mek dona kawnga thawhdun dante an sawi.
Meghalaya chief minister Conrad K Sangma chuan Assam chief minister Himanta Biswa Sarma hnenah an state tana oxygen an pek avangin lawmthu hrilhin, a ṭul anga thawhpui zel turin a sawm nghal a ni.
Sarma pawhin Covid-19 hri leng dona kawnga Meghalaya sorkar chu an theih anga puih zel an inhuam thu a hrilh a, an mamawh chhung chu Amingao leh Bongaigoan aṭangin nitin medical oxygen metric ton 16 an thawn zel tur thu a sawi. Meghalaya-a lockdown puan vanga bungrua leh mamawh phurtu motor-ten harsatna an tawh lohna tura hma lak pui turin a ngen nghal bawk.
Assam CM chuan Meghalaya tan Covaxin dose 100 leh D Type cylinder an pek leh tur thu a sawi. Sorkar laipuiah Assam chu hmarchhak bial tana logistic hub atana siam tura rawtna thlen a nih thu leh, an rawtna hi thlawp turin Meghalaya sorkar an ngen tih a hrilh bawk a ni.