Manipur sorkarin ambulance siren ti ri lo turin hriattir
Manipur sorkar chuan Covid-19 hri kai phurtu ambulance-te chu siren an tih rik chuan mipuiah chiaina a thlen ṭhin nia sawiin, an siren-te ti ri tawh lo turin a hriattir.
State medical directorate chuan memoradum siamin, ambulance-in hri kai a phurh a, a siren-te a tihrik hian mipuiah phawklekna leh chiaina a thlen thei a ni tiin, kawng block a nih loh chuan a dangah siren ti ri lo tura an duh thu an sawi. Hemi hnu hian state sorkar chuan ambulance siren hi ti ri lo turin a ti ta a ni.
Manipur sorkar chuan Imphal West, Imphal East, Bishnupur, Ukhrul, Thoubal, Kakching leh Churachandpur district-a May 8 aṭanga curfew a puan chu May 28 thleng atan a pawhsei leh bawk.
Thawhlehni khan Manipur-ah hri kai thar 624 awm lehin, hri kai hmuh chhuah hi mi 40,683 an awm tawh a ni. Hemi ni vek hian hri vanga thi mi 20 awm belh lehin, Covid-19 vanga thi hi mi 612 an tling tawh a ni.