Manipur-in Covid-19 zirchiang turin expert committee a din

Manipur sorkar chuan an state-in Covid-19 hri leng thawh hnihna a tawrh mekah, hripui vanga thi chungchangte zirchiangtu tur, member pasarih awmna expert committee a din.

Expert committee hi health department director Dr K Rajo Singh-a'n a kaihruai dawn a, member-ah hian RIMS director Dr A Santa Singh, JNIMS medical superintendent Dr Kh Lokeshwar Singh, Babina Diagnostics managing director Dr Th Dhabali, All Medical Association (IMA) Manipur state branch president Dr S Jugindro, MoHFW regional director Dr L Ashananda Singh leh additional director of health services Dr Lalthari Hmar-te ruat a ni.

Committee hian an state-a Covid-19 hri vanga thite chungchang zirchiangin, hospital, Covid-19 care centre leh home isolation-a invenna kalpui dan tur rawtna te an siam ang.

Manipur-ah hian hri leng thawh hnihnaah hri kai leh thihpui an pung nasa hle a, mipui pawh an chiai hle a ni. Healthcare sector lam pawh an buai tawh a, a bikin Imphal area-a hospital-te chu Covid-19 hri kai enkawlin an buai a, damdawi-in khum pawh an indaih lo hle tawh a ni. An state-ah hian Covid-19 vanga thi mi 612 an awm tawh.