Meghalaya Speaker-in MLA-te meeting neihpui

Meghalaya assembly speaker Metbah Lyngdoh chuan Nilaini khan Member of Legislative Assembly (MLA)-te chu Covid-19 hri leng chungchangah review meeting a neihpui.

Meeting hi chief minister Conrad K Sangma leh leader of opposition Dr Mukul Sangma ten a telpui a ni.

Speaker Metbah Lyngdoh chuan House member-te hnenah an state chhunga hri leng dinhmun te, sorkarin hri dona atana hma a lak hrang hrangte a hrilh. MLA-te nen hian state chhung hmun hrang hranga oxygen plant siam dan tur te, damlo enkawlna tur khum tam zawk siam leh, corona care centre siam chungchangte an sawiho zui.

Lyngdoh chuan meeting hlawk tak an nei tih sawiin, MLA-te rawtna hrang hrangte pawh sorkar chuan a ngaihtuah zui dawn a ni, a ti.

State mipuite pawh chiai lo leh sorkara innghat ngam turin Speaker chuan a chah a, Covid-19 vaccine pawh an lak hun a thlenah la ṭheuh turin a ngen. Tualchhung pawl, NGO, sakhaw hruaitu hrang hrangte chu hri dona kawngah sorkar thawhpui leh pui zel turin a ngen a, "Nikumah thawhhona ṭha tak hnuaiah hri leng kan do tlang a, kuminah pawh khatiang ang bawk khan kan chhunzawm leh theih ngei kan beisei a ni," a ti.

Leader of opposition Dr Mukul Sangma chuan hri vanga an chhungte chante an tawrhpui thu sawiin, sorkar hnenah pawh mipuite harsatna leh mamawhte ngaihven sak reng turin a ngen. Dr Mukul chuan hri chu a inthlak danglam zel avangin hri leng hi a reh mai a rinawm lo tih a sawi a, hei vang hian hri dona atana pawimawh, taksa tihchakte chu ngaih pawimawh turin ṭhalaite a chah nghal bawk.