Tripura-ah Corona Crisis Management Group din

Tripura sorkar chuan an state-a hri leng do hna thawktu tur Corona Crisis Management Group a din.

Chief secretary Manoj Kumar chuan state, district leh block level-ah committee din vek turin thupek a tichhuak a, heng committee-te hian hri darh zel tur venna atan hma an la ang.

Law minister Ratan Lal Nath chuan committee-te hian nitinin hri leng dinhmun an thlir ṭhin dawn a, hri leng dona atan a ṭul anga hma lain, mipuite zirtirna kawngah pawh a hmahruaituah an ṭang dawn a ni, a ti.

State level committee-ah hian chief minister, deputy chief minister, revenue minister leh education minister-te bakah MP te, chief secretary, health and family welfare department secretary leh Tripura police chief, revenue secretary leh director-te an tel.

District-level committee-ah hian bialtu MLA-te telh vek niin, cabinet minister-te pawh mawhphurhna pek tel an ni bawk.

Nath chuan committee-te kaihhruaina hnuaiah hri leng dona kawngah thawhhona ṭha tak an neih zel an beisei thu a sawi.