Manipur sorkarin JNIMS-ah oxygen storage tank siam
Manipur-ah dam lo enkawlna atana oxygen mamawh a san zel avangin, state sorkar chuan kar liam ta Inrinni aṭang khan Imphal-a Jawaharlal Nehru Institute of Medical Sciences (JNIMS)-ah litre 10,000 awm theihna tur Liquid Medical Oxygen Cryogenic storage tank a siam.
10 KL tank hi Zirtawpni tlai khan Imphal-ah phurh thlen a ni.
Chief minister N Biren Singh chaun KL tank hi Gujarat aṭanga phurh thlen a ni tih sawiin, D-type oxygen cylinder 1,300 vel dah theih ani tih a sawi. Plant hi ni reilote hnuah hman theih a nih a beisei thu a sawi bawk.
Manipur-a Covid-19 hri leng thawh hnihna a thlen hnuah state sorkar chuan oxygen mamawh sang zel phuhrukna turin kawng hrang hrangin hma a la a, oxygen plant-te siam belhin, state pawn lam aṭangin oxygen cylinder-te a lalut bawk a ni. JNIMS-a plant siam hi zawhfel a nih hunah chuan state dang aṭanga oxygen lakluh pawh a tlahniam dawn a ni.
State sorkar chuan JNIMS-ah hian Pressure Swing Absorption (PSA) oxygen plant pahnih a siam dawn bawk a, heng plant-ah hian ni kharah oxygen hi cylinder 200 ve ve siamchhuah theih a ni ang.
Nagaland leh AP-in WHO aṭangin oxygen concentrator dawng
Nagaland chuan kar liam ta Inrinni khan World Health Organisation (WHO) hnen aṭangin oxygen concentrator 150 an dawng. Hemi hma hian state sorkar lei, oxygen cylinder-te pawh Indian Air Force-in an lo phurh thlen sak tawh bawk.
Health minister S Pangnyu Phom chuan WHO in a tumsak, oxygen concentrator chu district hrang hrangah mamawh dan azirin sem darh a ni dawn tih a sawi. Hun harsa tak an tawn mekah WHO lamin an mamawh tur a rawn tumsak chu lawmawm a tih thu a sawi bawk.
Arunachal Pradesh sorkar pawhin Inrinni vek khan WHO hnen aṭangin oxygen concentrator 150 a dawng bawk.
AP health minister Alo Libang chuan oxygen concentrator-te hi lo dawngin, WHO chungah an lawm hle tih a sawi. Oxygen concentrator-te hi district hrang hranga hospital-ah sem a ni dawn a ni, a ti. Minister chuan PM-CARES fund leh NGO-te puihna hnuaiah state khawpui leh district hrang hrangah oxygen generator plant siam a ni dawn tih a sawi.