Nagaland sorkarin healthcare worker-te incentive pek belh dawn

Nagaland sorkar chuan sorkar leh private sector hnuaia healthcare worker, Covid-19 dona kawnga thawktute chu incentive pek belh a tum.

State chief secretary, J Alam chuan hemi chungchanga hriattirna hi Inrinni khan a tichhuak a ni.

Sorkarin thutlukna a siamah hian medical zirlai, Covid-19 duty-a thawkte chu stipend pek an ni ang. Zirlai chhawr turte hi thla thum chhung atan district task force (DTF) ten an ruat thei dawn a ni. Covid-19 duty atana zirlai ruat tur hi Kohima leh Dimapur district-ah mi 30 chin bithliahin, district dangah chuan mi 10 chin tur a ni.

Duty tura ruat zirlaite hi an category azirin stipend pek an ni dawn a, Clinical Covid/Non-Covid-10 Duty/Essential Service-a chhawr MBBS intern leh BDS/AYUSH intern chu thla khatah Rs 25,000, BSC-Nursing intern chu thla khatah Rs 13,500, GNM/Technician intern chu Rs 10,000 leh ANM intern chu thla khatah Rs 8,500 pek an ni ang.

Non-clinical duty-ah chuan final year (MBBS/ BDS/ AYUSH) intern tan thla khatha Rs 9,000, final year (BSc-Nursing/ GNM/Technician) tan Rs 8,000, final year (ANM) tan Rs 7,500 leh final year la ni tan Rs 6,000 pek an ni thung dawn a ni.

Sorkar chuan medical zirlaite hi recruitment examination-ah Covid duty leh a kaihhnawiha an thawh dan chu total mark aṭangin 25% a puttir dawn a, sorkar leh private facility-ah Covid-19 duty-a ni 100 chin thawkte chu sorkar hna nghet laknaah dah pawimawh an ni bawk ang.

Medical officer service lai zingah Covdi-19 duty-a ni 100 thawk chinte chu an zir chhunzawm duh a nih pawhin dah pawimawh an ni dawn a, anni pual bik hian Study Leave rules siam a ni dawn.

Healthcare worker, Covid-19 hri kai enkawlnaa ni 100 chin thawkte chu an grade entry level salary-a 25% lawmmanah pek belh theih an ni.

Private hospital-a Covid-19 hri kai enkawlnaa thawk, an hnathawhna aṭanga hri kai healthcare worker-te inenkawlna man chu sorkar hnathawk nghet pangngai angin state sorkar chuan an tum sak dawn bawk a ni.