Assam-ah oxygen metric ton 80 phurtu Oxygen Express thleng Hmarchhak state dangah oxygen kan supply dawn : CM Sarma

Assam-ah Pathianni khan medical oxygen metric ton 80 phurtu Oxygen Express rel a thleng. He rel hi Jharkhand-a Tatangar Railway station aṭanga rawn kalin, oxygen dahna container pali a rawn phur a ni.

Oxygen Express hi Assam-ah kar khata vawi hnih zel kalin, medical oxygen ton 160 a rawn dah ṭhin dawn a ni.

Chief minister Himanta Biswa Sarma chuan an state-in oxygen an mamawhna, a bikin Covid-19 hri kai te enkawlna atana an mamawh a phuhru thei dawn tih sawiin, an mamawh bak chu hmarchhak state dangah an supply zel dawn tih a sawi. An state-ah chuan medical oxgyen litre 800 dah ṭhatna an nei tih a sawi bawk.

Indian Railways chuan state hrang hrangah Oxygen Express rel 234 hmangin Liquid Medical Oxygen (LMO) a pe ṭhin a, LMO metric ton 15,284 a sem tawh a ni.

Congress MLA-ten ambulance 58 pe dawn
Assam eptu party, Congress MLA 29-te chuan MLA local area development fund aṭangin an bialah Covid-19 hri kaite tana hman turin ambulance 58 an pe dawn.

Assam Pradesh Congress Committee (APCC) president Ripun Bora chuan All India Congress Committee (AICC) in a ngen angin, MLA-te hian an bial tan ambulance pahnih ṭheuh an pe dawn tih a sawi. Hemi atan hian state sorkar chu MLA LAD chu pe chhuak thuai turin an ngen bawk.