ULFA(I) in an mi rukbo chhuah
United Liberation Front of Asom (Independent) chuan thla khat chuang liam taa an mi ruk bo, ONGC-a thawk Ritul Saikia chu Pathianni khan Mon district, Nagaland-a Myanmar ramri bulah an chhuah.
Assam chief minister Himanta Biswa Sarma chuan helpawl hnenah hian an mi man hi chhuah turin a lo ngen a, May 18 khan Ritul Saikia chhungte pawh a lo tlawh tawh a ni.
Saikia hi Pathianni zing dar 7 khan Myanmar ram chinah helpawlte hian an chhuah a, minute 40 chhung vel kea kalin India ram lama Longwa khua a rawn thleng tih Assam police official chuan a sawi. Army leh Nagaland police-ten Mon police station-ah hruaiin, a hriselna dinhmunte enfiah sak a nih hnuah, Assam police team chuan a chenna, Assam-a Jorhat district-a Titabar khuaah an hruai haw a ni.
ULFA(I) helpawl hian April 21 khan Assam-Nagaland border-ah ONGC hnuaia thawk mi pathum an rubo a ni. An zinga pahnih chu April 24 khan chhanchhuah an lo ni tawh a ni. May 20 khan CM Sarma chuan press conference a neihnaah, ULFA (I) hotu Paresh Baruah hnenah Saikia chhuah turin a ngen a, Assam sorkar chuan oil company-te hnenah an state tana investment tam zawk ti tura a ngen tur thute a sawi.
Assam CM Sarma leh governor Jagdish Mukhi chuan ULFA(I) ten an mi hren an chhuah ta chu lawmawm an tih thu an sawi. CM chuan an state-ah boruak ṭha leh muanawm tak a awm zel a beisei thu leh, state hmasawnna tura thawhhona ṭha tak an neih zel a beisei thu a sawi a ni.