Manipur sorkarin hri vanga thite phum leh halna senso tum dawn

Manipur sorkar chuan an state-a Covid-19 hri vanga thite phumna leh halna senso a tum vek dawn tih chief miniser N Biren Singh chuan a sawi.

Pathianni khan CM Singh hian video conferencing hmangin hri kai enkawl lai ṭhenkhat chu a kawm a, an harsatna neihte an sawipui a ni. CM chuan, "Kan inkawmna aṭang hian hri vanga thi chhungte sum lama harsatna hrang hrang an tawh dante kan hria a, hei vang hian hripui vanga thite vuina senso chu sorkarin tumsak vek a tum ta a ni," a ti.

Singh chuan virtual meeting neihnaa tel, hri kai enkawl mekte chungah lawmthu sawiin, an harsatna leh mamawh sawite pawh ngaihtuah sak zel an tum tih a sawi. Hetianga dam lo enkawl mekte nena inkawmna hun an siam hi zan tin, zan dar 7-ah neih ziah tum a ni tih a sawi bawk.

Chief Minister chuan dam lo te chu thlaphang leh chiai lo tura fuihin, rilru chak tak nena do let turin a chah. Hemi rual hian an state-ah hri vanga thi mi eng emaw zat an awm tawh thu sawiin, mipuite chuan hri darh tur venna atana sorkarin kaihhruaina a siamte an zawm ṭhat a, an fimkhur zual zel a ṭul thu a sawi.

Hri kai, in lama inenkawl tam tak an ṭha chhuak tawh tih Singh chuan a sawi a, in lama in enkawlte pawhin damdawi leh an mamawh dangte a hun taka an hmuh zel theihna turin ruahmannate siam a ni, a ti. An harsatna neihte pawh official-te hnena hrilh thuai ṭhin turin a chah bawk.

Covid-19 hri kai inenkawlna senso chu Chief Minister Hakshelgi Tengbang (CMHT) leh Pradhan Mantri Jan Arogya Yojana (PMJAY) scheme huam tir a ni dawn tih CM chuan a sawi bawk. CMHT leh PMJAY card holder-te chuan heng scheme hnuaiah hian damdawi-ina enkawlna senso an pek a ngai dawn lo a ni.