"Bawng hi kan nu ber a ni, bawng talh hi khap a ngai" - Assam CM

Assam chief minister Himanta Biswa Sarma chuan Thawhṭannia assembly session-a thu a sawiah, a kaihhruai BJP sorkar chuan an state-ah bawng humhalhna turin theihtawpin hma a la dawn tih a sawi.

Chief Minister chuan, "Bawng hi kan nu ber a ni. West Bengal aṭanga bawng lakluh kan remti tawh dawn lo. Hindu te chenna leh bawng kan biakna hmunahte chuan bawng sa ei kan phal dawn lo. Mahse hei vang hian mi zawng zawng tan bawngsa ei kan khap dawn tihna erawh a ni lo," tiin a sawi.

Himanta Biswa Sarma chuan Assam-a bawng humhalhna tur bill siam rawtna a thlawp thu sawiin, bawng talh khap a ngai tih a, dan loa bawng hmanga sumdawnna pawh phal a ni dawn lo tih a sawi bawk.

BJP sorkarna state ṭhenkhat - Uttar Pradesh, Karnataka leh Madhya Pradesh-ah chuan bawng humhalhna dan hi hman a ni tawh.

May 22-a 15th Assam Legislative Assembly session hmasa ber ṭanniah khan governor Jagdish Mukhi chuan bawng chu mipuiin an zahin an bia a, hei vang hian state sorkar chuan bawng humhalhna tur, cow protection bill chu assembly session neih leh hunah pharh a tum a, state dang aṭanga bawng lakluh pawh khap tum a nih thu a lo sawi lang a ni.

Assam-ah hian bawngsa ei hi khap a ni lo a, an dan hman mek Assam Cattle Preservation Act, 1950 hnuaiah chuan bawng, kum 14-a upa chin chu veterinary officer-in phalna a pek angin talh phal a ni. Mahse BJP sorkar thar chuan he dan hi siamṭha a, bawng humhalhna tur dan siam a tum a ni.

Chief Minister thusawi hi BJP MLA-te chuan an thlawp thu an sawi a, BJP MLA Mrinal Saikia chuan Hindu sakhua leh bawng chuan inzawmna a neih avangin, Hindu chen tamna bialaah chuan bawng talh a ni tur a ni lo, a ti. Hotel-ah pawh zalen taka bawngsa hralh lo tura a duh thu a sawi bawk. Hemi rual hian bill chu bawng talh khap tumna ni loin, bawng humhalh tumna zawk a ni, tiin a sawi.

BJP MLA dang Jayanta Malla Baruah pawhin bawng humhalh chu thil pawimawh tak a nih thu sawiin, "Nu ber tiin kan sawi a, bawng hi kan be bawk a ni. Hei vang hian bawng talh leh a sa zawrh hi kan pawm thei lo. Kan nu ber that ang kan ni. Hetiang hi Assam-ah a thleng tur a ni lo," a ti bawk.