Nagaland-in oxygen a ngah tawk : HPC

Nagaland high po­wered committee (HPC) thupuangtu Mnho­n­lumo Kikon chuan an state-ah Covid-19 hri kai pung zel mah se, sorkar chuan hri kai enkawlna atana mamawh oxygen chu a ngah tawk tih a sawi.

MLA Kikon chuan Chumoukedima-a oxygen depot-ah oxygen cylinder 980 a awm mek thu leh, a dang 800 pawh Ahmedabad aṭanga a thlen leh tur thu a sawi. "Oxygen indaih loh hlauhthawn tur a ni lo. Tun dinhmunah chuan kan ngah tawk hle a ni," a ti.

Kikon chuan Dima­pur-a CIHSR campus-ah khum 176 awmna Covid-19 hospital siam a ni dawn tih a sawi a, "Sum lamah harsatna te awm mah se, Nagaland sorkar chuan state mipuite himna leh damna chu a ngaih pawimawh ber a ni," tiin a sawi.

Hri leng vanga state puma lockdown puan mek chu hri darh zel dan te, positivity rate leh Covid facility-a khum awmdan azirin puan chhunzawm a nih dawn leh dawn loh ngaihtuah a la ni dawn tih a sawi bawk.

State positivity rate chu 2%-ah a tlakhniam tawh thu sawiin, Kikon chuan rate hi a tlahniam chhunzawm zel a beisei thu a sawi.

Thingtlang lamah hri a darh lohna turin sorkar chuan kawng hrang hrangin ruahmanna a siam tih a sawi a, district tast force (DTF) tinte pawh invenna lam ngai pawimawh tura hriattir an ni. Covid-19 syptom neite hriatchhuah zung zung an nih theihna turin community surveillance team pawh siam a ni tih a sawi bawk.