Assam : NDFB pawl pathum ṭhiat

Assam-a National Demo­cratic Front of Boroland (NDFB)  helpawl hnuaia pawl pathumte chu Thawhṭanni khan ṭhiah an ni. Kum 1986, October 3-a din, NDFB pawl pathum ṭhiahte hi Dhiren Boro, Ranjan Dai­mary leh B Saoraigwra 

lamṭang pawlte an ni. Heng pawl pathum ṭhiahna inkhawm hi B.Ohnjalu kaihhruaina hnuaiah Udalguri-a Sonai designated camp-ah neih a ni. 

Boro, Daimary leh Sao­raigwra te chuan thuchhuah inṭawm siamin, kum 34 chhung zet chu Assam-ah Boro hnam leh a ram leilung fate dang tan an lo bei tawh tih an sawi. Mahse kumin January 27-a sorkar laipui nen inremna an ziah tak avangin, an ralthuamte dahthlain an helna chu an titawp ta tih an sawi. 

Kum 1990 khan union ministry of home affairs chuan NDFB hi Unlawful Activities (Prevention) Act, 1967 hnuaiah dan pawnah a lo hnawl tawh a ni. Kum 2005 khan inremna kawng zawngin NDFB leh sorkar laipui chuan inkahhai pawh an lo puang tawh bawk. Kum 12 chhung zet sorkar nena inbiakna an neih hnuah kumin January thla khan inremna hi an ziak thei ta a ni. Hemi hnu hian NDFB  hnuaia pawl pathumte chuan an pawl ṭhiah hi an remti ta a ni, tiin an thuchhuahah an tarlang. 

NDFB hi an din tirhah chuan Bodo Security Force tih niin, Ranjan Daimary kaihhruaina hnuaiah a awm. Kum 1994, November 25 khan an pawl hming hi National Democratic Front of Boroland (NDFB) tiin an thlak a ni. A hnuah NDFB hi Dhiren Boro, Ranjan Daimary leh B Saoraigwra kaihhruai pawl pathumin an awm zui a ni.