Tripura-in June 5 thleng Covid-19 curfew pawtsei
Tripura sorkar chuan Agartala Municipal Corporation (AMC) area-a Covid-19 curfew a puan chu June 5 thleng a pawtsei.
Education minister Ratan Lal Nath chuan hri kai thar an la pun zel avangin curfew hi pawhsei a nih thu sawiin, state chhung hmun dangah pawh khuahkhirhna khauh tak hman chhunzawm zel a ni dawn tih a sawi.
State sorkar hian a hmain urban local body huam chhungah May 26 thleng atan curfew leh hmun dangah night curfew a lo puang tawh a ni. Mahse kar khat liam ta chhung khan hri kai thar, positivity rate hi 21.37% zet a la ni a, hei vang hian curfew hi pawhsei chhunzawm leh an rel ta a ni.
Thawhlehni khan Tripura-ah hian hri kai thar 773 awmin, hripui vanga thi hi mi 470 an awm tawh. Curfew puan chhung hian essential service chu ngaihnathiam an ni dawn thung a, zing dar 6 aṭanga chhun dar 12 thleng an inhawn phalsak an ni.
Assam-in urban area-ah curfew puan chhunzawm
Assam sorkar pawhin hripui leng vanga curfew a puan chu June 5 thleng a pawtsei ve bawk.
Chief minister Himanta Biswa Sarma chuan lockdown puan a ni lo a, mahse curfew hi pawtseiin, urban area-ah chhun dar 12 aṭanga hman ṭan a ni a, rural area-ah pawh chawhnu dar 2 aṭanga hman ṭan a ni tawh dawn tih a sawi.
CM chuan Srirampur inter-state check point aṭanga motor lutte uluk zuala enfiah tur leh, Covid-19 test neih sak zel turin district thuneitute leh health department a hrilh bawk.
Assam-ah hian Thawhlehni khan Covid-19 vanga thi mi 92 awmin, hri kai thar 5,767 an awm bawk. An state-a hripui vanga thi hi mi 2,915 tling tawhin, hri kai mek hi 53,541 an awm.
Meghalaya-ah hri vanga thi 500 tling tawh
Meghalaya-ah Thawhlehni khan Covid-19 hri vanga thi mi 19 awmin, an state-a hripui vanga thi hi mi 502 an awmtawh a ni.
Thawhlehni thleng khan active case 7,971 an awm a, hri kai enkawl dam tawh mi 22,976 an awm tawh thung.
Chief minister Conrad K Sangma chuan hri kai enkawlnaah oxygen lama harsatna an tawh lohna tura state chhung hmun hrang hrangah oxygen plant siam mek a nih thu a sawi.
Sorkar building,la hman lohte chu Covid Care Centre-a siam tumin sorkar chuan hma a la mek. Deputy chief minister Prestone Tynsong hoin centre-a siam tur hian Rynjah-a ITI office building, Malki-a Basic Training Centre building sak zawh hlim leh Nongrim Hills-a Directorate of Commerce and Industries building-te chu enfiah a ni. Tynsong chuan heng building-te hi Covid Care Centre atan a rang thei anga peihfel tum a ni tih sawiin, hri kai enklawna tur khum 150 vel a awm belh thei dawn a ni, a ti.
Nagaland CM-in Covid-19 hospital hawng
Nagaland chief minister Neiphiu Rio chuan Dimapur district-a khum 30 awmna Covid-19 hospital thar chu Thawhlehni khan a hawng.
Covid-19 hospital thar hi Chumukedima-a Nagaland Police Referral Hospital-ah siam a ni a, ICU khum pasarih, oxygen bed panga leh oxygen concentrator 15 dah tel a ni.
CM hian he complex-ah vek hian khum 75 awmna Covid-19 hospital siam mek pawh a endik nghal bawk a, hna thawh danah a lungawithlak thu a sawi. DGP John Longkumer chuan ni 20 chhungin he hospital hi peihfel a nih tur thu CM hi a hrilh.
Hei bakah hian Institute of Hotel Management-a Covid-19 makeshift hospital, khum 100 awmna tur siam mek te, Christian Institute of Health Sciences and Research (CIHSR)-a khum 176 awmna tur Covid-19 hospital siam rawtna hmunte pawh CM hian a enfiah nghal bawk a ni.
Manipur-ah ruihhlo tite test neihsak
Manipur sorkar chuan Thawhṭanni aṭang khan Imphal khawpuiah ruihhlo tite chu Covid-19 test a neihsak.
He test hi state welfare department, FINGODAP Manipur chapter leh Drug Users' Federation for Human Rights and Justice-te hmalaknain buatsaih a ni a, mi 33 an test. Mahse an zinga pakhat chauhin hri a kai tih hmuhchhuah a ni.
Social welfare director Ngangom Uttam Singh chuan ruihhlo ngai, an chhungten an tuithlar, kawtthlera khawsa mai mai eng emaw zat an awm a, hengte hian an dinhmun hriatfiah sak a nih loh chuan hri darhna pakhat an ni ve thei a ni, a ti.