AIUDF-in Assam RS inthlanah Priyanka Gandhi Vadra ding turin duh

All India United Democratic Front (AIUDF) chuan Assam Rajya Sabha inthlan neih turah Congress-in Priyanka Gandhi Vadra an din tir chuan thlawp an tum. 

Assam Pradesh Congress Committee (APCC) president Ripun Bora chuan hemi chungchang hi sawiin, Congress chuan candidate atan Priyanka emaw, Congress pawn lam mi emaw a dah chuan AIUDF hian an candidate hi an thlawp dawn tih a sawi a ni. 

Congress chuan Rajya Sabha inthlana an party candidate atan hian a tirah chuan anti-Citizenship Amendment Act (CAA) activist dah a rawt a, mahse tihfel a la awm lo. Bora chuan, 'AIUDF in kan party hruaitu Priyanka an rawn rawt chhuak hi kan hlim hle a ni. Mahse candidate tur hi chu party high command lam thutlukna siam tur a ni. Candidate tura kan duh list te chu kan thawn tawh a, hei hi an lo tifel thuai pawh kan beisei a ni," a ti.

 

March 26 hian Rajya Sabha seat 55-ah inthlan neih a ni dawn a, inthlan neihna tur zingah hian Assam-a seat pathum pawh a tel. He inthlan neih tur atan hian AIUDF leh Congress party chuan common candidate siam rawtin, an inbe mek a ni.