Tripura sorkarin mi retheite ṭanpuina tur Financial package Rs vbc 579 a siam

Tripura chief minister Biplab Kumar Deb chuan coronavirus leng vanga nitin khawsak leh eizawnna kawnga harsatna tawk, state chhunga chhungkaw rethei zawkte ṭanpuina, financial package Rs vbc 579 siam a nih thu Ningani khan a puang.

Tripura Tribal Areas Autonomous District Council (TTAADC) headquarters, Khumu­lwng-a Kherengbar Community Health Centre (CHC)-a 150 LPM oxygen generation siamna tur lungphum a phumnaah, CM chuan state chhunga chhungkaw rethei zawkte ṭanpuina tur siam a nih thu hi a sawi a ni.

Chief Minister chuan, "Covid-19 hri leng vangin mi tam takin eizawnna kawngah harsatna an tawk mek a, sorkar chuan harsatna tawkte puihna tur hian MGNREGA hnuaiah Rs vaibelchhe 332 hu hnathawh tur siam a tum a ni," a ti.

Tripura sorkar chuan chhungkaw nuai 7-te hnena ration leh pawisa Rs 1,000 a pek tur thu Deb chuan a sawi a, pawisa hi direct bank transfer (DBT) hmangin pek an ni ang. Hemi atan hian sorkar chuan Rs vbc 70 a seng dawn a, hei bakah hian a thlawna ration a pekna tur atan hian Rs vbc 80 a seng dawn bawk.

Biplab Kumar Deb chuan mi nuai li vel hnenah social pension, thla hnih pual chu pek lawk tum a nih thu a sawi a, hei bakah mi harsa zawkte ṭanpuina turin Tripura Urban Employment Programme (TUEP) hnuaiah Rs vbc 24 sanction a nih thu a sawi.