Covid test-na tam zawk siam turin Nagaland sorkar hriattir
Guwahati High Court-a Kohima Bench chuan Nagaland sorkar hnenah Covid-19 test-na hmun tam zawk siam tur te, a thlawn veka test hi neihsak tur leh, vaccine pek chhuah chu chak zawka kalpui turin a hriattir.
Justice Songkhupchung Serto leh justice S Hukato Swu awmna Kohima Bench chuan May 24-a Nagaland sorkar laka public interest litigation (PIL) thehluh a ngaihtuah hnuin, state sorkar hnenah he hriattirna hi pein, kar hnih hnuah hearing hi neih a ni leh ang.
High Court chuan nikuma hri len lai khan state sorkar chuan thingtlang lamah Covid positive-te awmna tur quarantine centre-te a siam a, mahse tun ṭumah erawh heng facility-te hi siam a ni tawh lo niin a sawi. Hri kaite hi in lamah inkhunghran tir an ni ta zawk a ni, a ti. Mahse mipuite khawsak dinhmun thlirin, home isolation-a dah hmain surveillance team chuan an inah room hran leh facility dangte a awm ṭha em tihte an enfiah hmasak a ngai a, inkhunghranna tur hmunhma nei ṭhate chauh chu home isolation-a dah tur an ni, a ti.
Court chuan thingtlang khaw hrang hrangah village council leh kohhran te bakah civil society organisation-te pawh hri kaite awmna tur hmun siam chungchang sorkar chuan thawhpui dan a zawn a ngai tih a sawi. Centre siamna atana mamawhte chu sorkarin a pe vek tur a ni, a ti.
State chhunga nitina Covid test neih chu a la tlem tih sawiin, high court chuan test tam zawk neih a nih theihna atan testing facility pawh tam zawk siam a ṭul thu a sawi. Hei bakah hian mahni duh thu ngeia in test-te pawh a thlawn veka test turin a ti bawk.