Manipur-in mass testing nei dawn

Manipur chief minister N Biren Singh chuan hri darh zel tur venna atan state chhung hmun hrang hrangah mipui nawlpui test runpui, mass testing chu neih a ni thuai dawn tih a sawi.

Ningani khan CM hian video conferencing hmangin Covid-19 hri kai, home isolation-a awm mekte a kawm a, kar khat chhunga hri kaite a kawm ṭum ṭhumna a ni.

CM chuan hri leng hluar zel tur venna pawimawh tak chu hri kaite hriatchhuah hma a, enkawlna pek hma a ni tih sawiin, test runpui neihna tur atan hian district hrang hrangah RAT kit 50,000 sem chhuah a ni tawh a, test kit nuai khat dang pawh order a ni leh tawh tih a sawi.

N Biren Singh chuan containment zone-a awm chhungkaw tinte chu test hi neihsak mek zel an ni tih sawiin, hri kai na zualte enkawlna tur ICU khum 100 pawh kar khat chhungin peihfel leh a ni dawn tih a sawi bawk.

State chhunga Covid-19 hri kaite enkawl­na tur health infra­structure tam zawk chu hri len hnua siam tharte an nih avangin duhthu an sam kher lo mai thei tih CM chuan a sawi a, mahse sorkar chuan mipuite nunna chhanhimna atan leh enkawlna ṭha an dawn theihna atan theihtawp a chhuah zel a ni, a ti. Hemi rual hian sorkar hmalakna chu ṭawiawm zel turin mipuite a ngen a, hri leng mek lakah fimkhur zual zel turin a chah.