Meghalaya-in hri kaite tana MHIS huam chin tipung

Meghalaya sorkar chuan Megha Health Insurance Scheme (MHIS) hnuaia Covid-19 hri kaite inenkawlna senso huam chin, Rs 4,900-a a bithliah chu Rs 60,000-ah a tipung.

Deputy chief minister Prestone Tynsong chuan private leh sorkar hospital-a hri kai enkawlna senso, MHIS-in a tumsak theih chin tihpun a nih thu hi Ningani khan a puang a ni.

Hetih lai hian MHIS hnuaia inziaklut hi 58.5% chuah an la awm thu sawiin, state mipuite he scheme hnuaia hamṭhatna awmte dawng thei tura inziak lut vek turin a sawm nghal bawk.

Tynsong chuan Shillong leh Tura-ah Corona health facility din thar a ni dawn tih sawiin, hemi atan hian sorkar laipui chuan DoNER ministry kaltlangin cheng vaibelchhe 6.7 a pe tih a sawi. Facility pahnih din turah hian khum 100 ve ve a awm thei dawn a ni.