Hmarchhak state-ten lockdown/curfew pawtsei
Hmarchhak state ṭhenkhat chuan Covid-19 hri leng vanga lockdown/curfew an puan chu an state-a hri kai tharin ziaawm lam a la pan theih loh vangin an pawtsei leh hlawm.
Arunachal Pradesh
Arunachal Pradesh chuan district pasarihah June 7 thleng lockdown a pawtsei a, assembly constituency tinah health facility pakhat chu hri kaite enkawl theihna tura thuam ṭhat an rel bawk.
Chief minister Pema Khandu chuan an state dinhmunte an zirchianna aṭangin hri leng laka an dinhmun chu a la hlauhawm a, hei vang hian hri darh zel tur venna atan leh nunna chhanhimna turin khuahkhirhna khauh tak kalpui zel a la ngai tih a sawi.
Manipur
Manipur-a district pasarihah hri leng vanga curfew puan chu June 11 thleng pawhsei a ni.
Hri darh tur venna atan Manipur sorkar chuan hri kai tam zualna district pasarih - Imphal West, Imphal East, Bishnupur, Thoubal, Kakching, Churachandpur leh Ukhrul-ah May 8 aṭang khan curfew hi a puang a ni. State sorkar chuan nitin hri kai hmuh chhuah an la pun zel avagin curfew pawhsei hi a la ngai niin a sawi.
Sorkar chuan district dang pakuate pawh curfew puanna district-te nen inkalpawh lo turin a ti bawk.
Meghalaya
Meghalaya sorkar pawhin East Khasi Hills huam chhunga total lockdown kalpui mek chu June 7 thleng a pawtsei bawk.
State khawpui Shillong awmna, East Khasi Hills district-a total lockdown puan hian tukin zing dar 5-a tawp tur a ni a, mahse kar liam ta kartawpa sorkarin review meeting a neihah, total lockdown puan chhunzawm hi a rel a ni.
June 7 thleng chu district dang nena inkalpawh khap a ni dawn bawk a, sorkarin office hawng tura a tih bik ni lo, central government office dang zawng pawh khar vek an ni ang.
Nagaland
Nagaland sorkar chuan state puma total lockdown a puan chu June 11 thleng a pawtsei.
High Powered Committee (HPC) on Covid-19 chuan state health department thurawn angin lockdown pawhsei hi a rel a ni.
State health department chuan Covid-19 hri kai thar hi tlahniam deuh mah se, thihpui erawh an pung thung niin a sawi. Department-in kar liam ta kartawpa weekly bulletin a tihchhuahah, hri vanga thi zinga 21% chu damdawi-in thlenpui an nih aṭanga darkar 24 chhunga thi niin a sawi a, hetihlai hian kar liamtaa hri vanga thi mi 84 zinga 10 chu in lama inkhunghrang an ni.
Naupang kum 14 hnuai lamah hri vanga thi an la awm lo a, hripui thihpui zinga 33% chu kum 45-59 inkar niin, kum 60-74 inkar 27%, kum 30-44 inkar 25%, kum 75 chunglam 12% leh kum 15-29 inkar 3% an awm.
Nagaland-a Covid-19 hri vanga thi zinga 50% chu natna benvawn nei niin, natna benvawn nei lo 5% an awm bawk. A dang 45% te chungchang chu zirchian mek a la ni.