Assam-ah a ṭum thumna atan Oxygen Express train thleng

Liquid Medical Oxygen (LMO) phurtu Oxygen Express train chu kar liam ta Inrinni khan a ṭum thumna atan Assam a thleng leh.

LMO metric ton 80 phurtu rel hi May 28 khan Jharkhand-a Tata Nagar aṭanga tlan chhuakin, May 29-ah Assam-a Amingaon-a Inland Container Deport a thleng a ni.

Northeast Frontier Railway (NFR) chuan May 23 leh 26 khan LMO MT 80 ve ve chu special train hmangin Assam-ah a lo phurh luh tir tawh bawk. Assam-ah hian LMO hi MT 240 phurh thlen a ni tawh a ni.

Indian Railways chuan state hrang hrangin hri kai enkawlna tura oxygen an mamawh rang zawka pek an nih theihna turin special train, Oxygen Express train hi April 24 khan a tlantir tan a ni. Thla khat chhungin state 19-ah special train 305 hmangin liquid medical oxygen ton 20,770 an phurh thleng tawh.

Oxygen ton 20,770 hi state 15-a khawpui 39-ah phurh thlen ni tawhin, special train hmanga oxygen peknate chu Uttarakhand, Karnataka, Maharashtra, Madhya Pradesh, Andhra Pradesh, Rajasthan, Tamil Nadu, Haryana, Telangana, Punjab, Kerala, Delhi, Uttar Pradesh, Jharkhand leh Assam-te an ni. Andha Pradesh, Tamil Nadu, Karnataka leh Telangana-te hian LMO hi ton 1,600 chuang an dawng tawh.

Covid-19 vangin Assam MLA thar 2 an thi
Assam-a MLA thlan thar pahnih chu Covid-19 hri vangin an thi tawh.

Kar liamta Inrinni khan United People's Party Liberal (UPPL) MLA Leho Ram Boro chu hripui vang hian a thi a ni. Nilaini liam ta khan Bodoland People's Front MLA Majenda Narzary chu Covid-19 kaihhnawih vangin a lo thi tawh bawk.