Assam-in August 15-ah state mipui 30% vaccine pek hman tum

Assam chief minister Himanta Biswa Sarma chuan Covid-19 vaccine chu an duh ang an hmu thei a nih chuan, August 15-ah state mipui 30% chu vaccine pek hman an tum tih Pathianni khan a sawi.

CM chuan kum 18-44 inkar pek tur vaccine hi tunah dose 20,000 - 25,000 vel chauh an kawl rih tih a sawi nghal bawk.

Pathiannia Gauhati Medical College and Hospital a tlawhnaah CM hian he thu hi a sawi a, vaccine siamtu company official-te pawh a biak tawh thu leh, June thlaah vaccine hi dose nuai sarih supply an tiam thu a sawi a, mahse an thawn ni tur erawh an la sawi thei lo ni, a ti.

Vaccine kawl sa an neih tam tawk loh avangin June thla chawlhkar khatnaah chuan kum 18-44 inkar hnena Covid vaccine pek chu kalpui chak theih a ni dawn lo tih sawiin, mahse chawlhkar hnihna aṭang chuan vaccine an order pawh dawngin, chak zawkin an kalpui theih a beisei thu a sawi.

Assam-ah hian mi 32,45,384 hnenah Covid vaccine dose khatna hi pek a ni tawh a, a dose hnihna nen la kim tawh mi 8,26,894 an awm tawh bawk.