State ṭhenkhatin Covid vanga nu leh pa chan Naupangte chhawmdawlna tur an siam
Hmarchhak state ṭhenkhat chuan hripui leng mek, Covid-19 hri vanga nu leh pa chan naupangte ṭanpuina leh chhawmdawlna tur an siam. Sorkar laipui pawhin PM CARES Fund hnuaiah Covid-19 hri vanga nu leh pa chan, naupangte chhawmdawlna tur scheme a siam bawk a ni.
Arunachal Pradesh
Arunachal Pradesh sorkar chuan Chief Minister Bal Seva Scheme hnuaiah Covid-19 vanga nu leh paten an thihsan naupangte chhawmdawlna a pe dawn.
Naupang fahrah, an chhungte hnaivaiin an enkawlte hnenah hian Juvenile Justice (Care and Protection of Children) Act, 2015 leh Child Protection Services (CPS) Scheme hnuaiah thla tin Rs 2,000 pek an ni dawn a, hei bakah hian state sorkar chuan Rs 1,500 zel a pek belh ve dawn bawk a ni. Fahrah ina awmte chu sorkar laipuiin thla tin Rs 2,160 a tumsak dawn thung.
State sorkar chuan naupangte tan hian mentor a ruat dawn a, Gazetted Group A officer/ social worker ruat an ni ang. Anni hian naupangte hi offline/online mode hmanga kawmin an chanchinte an ngaihven reng ang a, an thil tih chak/tui zawngte sawipuiin, hei hi thuneitute lamah an thlen ve leh dawn a ni.
Manipur
Manipur chief minister N Biren Singh chuan an state hripui leng vanga fahrahte sum lama puihna, Chief Minister's Bal Seva Scheme siam a nih thu Pathianni khan a puang.
CM chuan he scheme hnuaiah hian state sorkar chuan hri vanga nu leh pa chan, an chhungte dang bula awm naupangte chu thla tin Rs 3,500 pek an ni ṭhin dawn tih a sawi.
Chhungte/enkawltu nei lo naupangte child care institution-ah dah an ni ang a, heng hmuna awm naupang kum 10 hnuai lamte chu sorkar laipuiin thla tin Rs 2,160 a pe thung dawn a ni, a ti.
An nu leh pa hminga in/ram awm, naupangte hminga thlak dawnin stamp duty lak a ni dawn lo a, kum 21 an tlin hma chu land revenue pawh awl tir an ni ang.
Scheme hnuaiah hian hmeichhiate chu Kasturba Gandhi Balika Vidyalayas (KGBV)-a an zir theihna tur ngaihtuah sak bik an ni dawn bawk tih CM chuan a sawi.
Class 11 leh a chunglam emaw, vocational course emaw zirlaite hnenah laptop a thlawna pek vek an ni bawk ang.
Tripura
Tripura sorkarin Covid-19 vanga nu leh pa chan naupangte chhawmdawlna tur 'Mukhya Mantir Balya Seva Prakalpa' a siam chu chief minister Biplab Kumar Deb-a'n a hawng.
CM Deb chuan he scheme siam thar hnuaiah hripui vanga nu leh pa chan naupang, an chhungten an enkawl zuite hnenah thla tin state sorkar chuan Rs 3,500 a pe dawn a, kum 18 an tlin thlenin a pe dawn tih a sawi. A thlawn vekin lehkha zirtir an ni bawk ang. Hmeichhiate chu pasal an neih hunah sorkarin Rs 50,000 in a ṭanpui dawn bawk a ni.
Fahrah enkawlna hmuna awmte chu an awmna man leh an mamawhte chu state sorkarin a tumsak vek dawn a ni.
Class X board exam an pass hunah, sorkar chuan laptop leh tablet a pe dawn bawk.
Deb chuan state sorkarin Covid-19 vanga nu leh pa chan naupang awm zat data hi a la nei lo tih a sawi a, mahse official-ten zirchianna an neih thuai tur thu a sawi.
Assam
Assam sorkar pawhin Mukhyamantri Sishu Sewa Achoni scheme hnuaiah hripui vanga nu leh pa chan naupangte chhawmdawlna a siamsak.
He scheme hmang hian naupangte hi thla tin Rs 3,500 pek an ni dawn a, child care institution-a awmte pawh an senso a tumsak dawn a, an lehkha zirna tur pawh a ngaihtuah sak ang.
Hmeichhia pasal nei rual tawh, nu leh pain Covid-19 vanga an thihsante chu Assam sorkar chuan Rs 50,000 bakah Arunadhati Gold scheme hnuaiah rangkachak tola khat a pe dawn bawk a ni.