Lockdown ngaih pawimawh loh vangin Thingtlang lamah Covid-19 hri a darh zual : Sikkim CM

Sikkim chief minister Prem Singh Golay chuan an state-a hri leng mek chu thingtlang lamah a darh zual niin a sawi a, hei hi hri darh tur venna atana sorkarin lockdown a puan an ngaihpawimawh loh leh zawm ṭhat tawk loh vang a ni, a ti.

Rural area-a cheng tam zawk chuan lockdown dante an ngai pawimawh lo a, hei hi tualchhung thuneitute pawhin an lo ngaihthiamsak leh mai ṭhin a ni, a ti. May 16 aṭanga state chhunga lockdown kalpui a nih hnuah pawh thingtlang lamah an lo pungkhawm fo a ni, tiin a sawi.

"Thingtlang khaw tam takah hri a darh nasa hle. Kan fimkhur a, lockdown lai chuan pawn chhuah hram an tum loh a ngai a ni. Mahse khaw ṭhenkhatah an la pungkhawm fo. Hri darhna hi punkhawmna hmun aṭangin a ni fo a ni," a ti. Hri kai, symptom nei ṭhenkhat chuan an zep a, an nat viau hnuah hospital an pan chauh nia sawiin, CM chuan inzep lo a, damdawi lam enkawlna dawng vat zawk turin mipuite a chah bawk.