Tripura-ah kum 45 chin 89% in vaccine la tawh

Tripura education miniter leh cabinet thupuangtu, Ratan Lal Nath chuan an state-ah kum 45 chunglam zinga 89% in Covid vaccine an la tawh tih a sawi. Hetih lai hian ram pum huap chuan kum 45 chin vaccine la tawh hi 35% chauh a la ni thung.

Ratan Lal Nath chuan May 31 thleng khan state hrang hrang zingah kum 45 chin, vaccine la tawh 60% awmna hi state panga chauh a la ni a, Tripura chu a la sang ber a ni, a ti.

Nath chuan vaccine pek ṭha ber an nih theihna chu tualchhung mipui leh pawl hrang hrangte sorkar an thawhpui ṭhat vang a ni tiin, vaccine la turin an chenna in aṭang tein an hruai ṭhin niin a sawi. State puma vaccine la tawh hi mi 16,06,456 tling tawhin, a dose khatna la hi mi 10,98,818 leh dose hnihna la kim tawh mi 5,07,638 an awm tawh a ni.

Minister chuan sorkarin vaccine kawl lai dose 2,73,390 a la neih thu leh, June thla chhungin dose 1,92,850 a dawn belh leh dawn tih a sawi bawk.