Manipur CM-in Thoubal-a PSA oxygen plant a hawng
Manipur chief minister N Biren Singh chuan Thawhṭanni khan Thoubal district hospital-a Pressure Swing Adsorption (PSA) oxygen plant siam thar a hawng. He plant aṭang hian oxygen hi minute khatah litre 100 siamchhuah theih a ni ang.
Manipur-ah hian kar khat chhungin PSA oxygen plant thar pahnih siam ani a, kar liamta Nilaini khan Churachandpur-a mi chu hawn a lo ni tawh bawk.
CM Biren Singh chuan Thoubal plant aṭang hian nitin D Type oxygen cylinder 22-24 siam chhuah theih a ni dawn tih sawiin, kar khat chhung leka plant thar pahnih an hawng thei chu lawmawm a tih thu a sawi a, hill district-ah pawh a dang siam leh thuai a ni dawn tih a sawi.
Chief Minister hian Thoubal district hospital-a ICU khum 10 leh khum 40 awmna, Covid-19 ward siam chu a hawng nghal bawk. Covid-19 ward-a khumte hi pipeline oxygen supply vek a ni dawn a, hri kai na zualte pawh an enkawl thei dawn a ni, a ti.
Singh hian DC complex-ah Thoubal leh Kakching district-a hri leng dinhmunte thlirin official-te chu review meeting a neihpui nghal bawk. Hri kaite hriatchhuah ran leh, enkawlna rang taka pek an nih theihna turin tun hnaiah an test neih sak pawh an pung hle a, hei vang hian hri kai hmuhchhuah pawh an pung chho niin a sawi. Hri kai an pun avang hian mipuite chu chiai lo tura chahin, enkawlna ṭha tak pek an ni zel tih a sawi. Media mite chu sample test zat leh hri kai enkawl dam zatte report tel zel turin a chah.