Covid-19 Hmarchhak dinhmun

Assam-ah Pathianni leh nimin khan hri kai hmuh chhuah belh mi 62 an awm a, hri kai hmuh chhuah tawh hi mi 1,390 an tling tawh. 

Hri kai hriat thar zingah hian thlawhtheihna hmanga haw pahnih an tel bawk. 

Assam-ah hian May 4-a zin khuahkhirhna thlahdul ṭan a nih aṭangin hri kai hi an pung chak hle. May 4  hma lamah Covid-19 kai  hi mi 42 chauh an awm a, mahse hemi hnu lamah hri kai hmuh chhuah belh an tam chak hle. Kar liam ta Zirtawpni khan hri kai hmuh chhuah hi mi 177 an awm a, an state-a ni khata hri kai hmuh chhuah tam ber ni a ni. 

Pathianni khan Tripura-ah hri kai hmuh chhuah belh mi 45 an awm a, nikhata hri kai hmuh chhuah tam ber ni a ni. Tripura-a Covid-19 kai hmuh tawh hi mi 316 an tling tawh a ni. 

Tripura chief minister Biplab Kumar Deb chuan Pathianni zing khan hri kai hmuh thar mi 11 an awm thu sawiin, zanah mi dang 34 te chu hri hi an kai tih hriat belh leh a nih thu a sawi. Mi 34-te hi Chennai aṭanga hawte vek an nih thu a sawi. 

Manipur-ah pawh hri kai hmuh belh a ni a, hri kai hmuh tawh hi mi 71 an tling tawh. Hetih lai hian hri kai enkawl zinga mi 11 enkawl dam niin, damdawiin aṭanga chhuah tir an ni tawh. 

Hri kai hmuh tharte hi RIMS-a Covid care centre-ah dahluh nghal an ni. Delhi aṭanga haw mi pahnih leh Pune aṭanga haw mi pahnihte chu hri kai hmuh thar zingah hian an tel a ni. 

Arunachal Pradesh-ah nimin khan Covid-19 hri kai 15 hmuh chhuah thar leh a ni a, ni khata hmuh chhuah tam ber ni a ni. Heti hian state chhungah mi 20 positive an awm mek a ni.

Hmarchhak mi nuai khat vel zet, state danga hnathawka awmte chu Shramik Special train hmangin an state-ah an haw tawh.

North East Frontier Railway CRPO Subhanan Chanda chuan hemi chungchang hi sawiin state hrang hrang sorkarin a mamawh ang zelin Shramik Special train-te chu an la tlantir leh zel dawn tih a sawi. 

Shramik Special train hmang hian hmarchhak aṭangin state dangah mi sing li vel thawn haw an ni ve tawh bawk a, nimin aṭang kha chuan North East Frontier Railway passenger phur rel paruk an service tir tawh dawn tih a sawi bawk.

Subhanan Chanda chuan rel pathum chu Assam-a tlan tur an nih thu leh a dang pathumte chu hmarchhak state dangah an service dawn tih a sawi. Hetih­lai hian rela chuang tur passenger-te hian inkaihhruaina dan an zawm ngai a awm dawn a, Aarogya Setu app pawh an hman ngei a ngai dawn a ni.