Assam : Doctor kutthlak vangin health worker-ten lungawi lohna lantir

Assam-a Hojai district-a Covid-19 duty doctor, Dr Suej Kumar Senapati kutthlak a nih avangin Nilaini khan Assam-a health worker-te chuan lungawi lohna lantirin, state pumah OPD service an boycott.

Dr Seuj Kumar Senapati hi Udali Model Hospital-a duty a ni a, he damdawi-inah Covid-19 hri kai thi pakhat chhungte chuan doctor hi beiin na takin kut an thlak zui a ni. He thil thleng hian dem a hlawh hle a, a bikin damdawi-in hrang hranga health worker-te himna ngaihtuahsak tura sorkar phutna pawh a nasa hle.

Tezpur Medical Hospital-ah chuan state sorkar hnenah hmun kilkhawr zawka awm doctor-te security guard pe turin nawrh huaihawt a ni bawk.

Assam chief minister Himanta Biswa Sarma chuan Udali Medical Hospital doctor kutthlak a nih chungchangah, he pawikhawihnaa inhnamhnawih mi 24 chu man an ni tawh tih a sawi. Police-te chuan heng mite lakah hian chargesheet thehlutin, hremna pek ngei an ni dawn a ni, a ti.

Sarma chuan doctor kutthlak a nih chungchang chhuina hi amah ngeiin a enpui zel dawn tih sawiin, rorelna dik lekkawh a tiam tih a sawi bawk.

Director General of Police Bhaskar Jyoti Mahanta pawhin hri leng dona kawnga a hmatawngtu, doctor beih leh kutthlak a ni chu an enliam mai dawn lo tih sawiin, Senapati chunga thil thleng chu frontline worker zawng zawng beihna anga an ngaih thu a sawi. "Hetiang thil hi a thlen nawn kan duh lo a, pawikhawihtute hi hremna pek ngei a ni ang. Thubuai rip tak siamsak an ni dawn a ni," a ti.

Political party hrang hrang pawhin doctor kutthlak a ni chu an dem thu sawiin, sorkar hnenah thil sualtitute chu hremna na tak pe tura an phut thu an sawi.

Assam Medical Service Association (AMSA) chuan health worker-ten beih an tawk leh anih chuan, hna thawk chhunzawm loin state pumah nawrh an huaihawt tawh dawn tih an sawi. Hospital leh healthcare facility hrang hrangah thawktute himna ngaihtuahsak tura phutin emergency service leh Covid Centre-a duty-te chuan badge dum an vuah bawk.