Manipur-in June 7-ah joint prayer meeting nei dawn

Manipur state-a sakhaw hrang hrang betute chuan an state-in Covid-19 hri leng a tawrh mekah ṭanpuina dilin June 7 hian Imphal-ah joint prayer meeting an nei dawn.

Nilainia chief minsiter N Biren Singh-a'n CM Secretariat-a sakhaw pawl hrang hrang hruaitute a kawmnaah ṭawngṭaina hun buatsaih hi an rel a ni. Meeting-ah hian CM chuan hri leng chungchangah mipuite zirtirna tam zawk nei turin sakhaw hruaitute hi a ngen a, lungrual taka hri dona kawnga an thawhhoa ṭul thute an sawi bawk.

Joint prayer meeting hi Imphal-a Kangla Fort-ah chawhma dar 10-ah neih a ni ang. Hei bakah hian June 6-ah Kristian sakhaw zuitu bikte chuan ṭawngṭai rualna hun an hmang dawn a, vawiinah Muslim leh Hindu sakhaw zuituten ṭawngṭaina hun hi an hmang dawn bawk a ni.

CM Singh kaih­­­­hruai sorkar chuan damdawi, oxygen, hman­rua dang leh thawktu indaih tawk loh vanga Covid-19 hri kai thi an awm lohna turin theihtawp a chhuah zel tih a sawi.

Hri laka invenna leh inenkawlna chung­changa mipuite zirtir­naah sakhaw hrang hrangte chuan chanvo pawimawh tak an nei a ni tiin, CM chuan mipuite chu SOP zawm ṭha tura zirtir tur te, test nei ṭha tur leh vaccine lakte ngai pawimawh tura mipuite zirtir turin a ngen. Heng zirtirnate hi biakin, mosque leh temple kaltlang pawha nei turin a ngen bawk a ni.

Meghalaya-ah pawh Pathianni khan hri leng mek laka venhimna dilin sakhaw hrang hrang betute chuan virtual prayer meeting an lo nei tawh bawk.