Meghalaya-in specialist doctor ngah tawk lo : Health Minister

Meghalaya health minister AL Hek chuan an state-in specialist doctor an indaih lo hle tih sawiin, hei hi district ṭhenkhata RT-PCR test-na tur an din theih lohna chhan pakhat a ni tih a sawi.

Minister chuan health department-in Jaintia Hills-a RT-PCR test-na tur a din theih lohna chhan sawifiahin, MBBS Microbiology leh MBBS Pathology specialist dah tur an awm loh vang a ni, a ti. Specialist healthcare worker an mamawhna a sang hle tih a sawi bawk.

Eptu hruaitu, Dr Mukul Sangma-a'n state chhunga hri leng dona kawngah rawtna a siamte pawh sorkar chuan lawmawm a tiin a dawngsawng ṭha hle a ni, a ti. Dr Mukul Sangma hian sorkar chu hri dona kawnga thawktu tam zawk neih a ṭul thu te, thingtlang lamah pawh hri kai an pun zel avangin ngaihven ṭhat a tul thu a sawi a ni.

Health minister chuan hri leng dona kawnga lungrual taka an thawhho zel tur thu sawiin, hri darh zau zel tur ven leh hripui vanga thi an tlem theihna turin theihtawp an chhuah zel dawn tih a sawi. Hemi rual hian hri leng thawh thumna lo thleng tura inbuatsaihna aiin, tuna hri leng mek hneh theih tura hmalak chu an dah pawimawh zawk tih a sawi bawk.