Manipur : Catholic kohhranin khum 40 awmna Covid-19 ward siam dawn

Manipur-in Covid-19 hri leng thawh hnihna a tawrh mekah, hri kai an pun chak avangin hri kai enkawlna hmun hrang hrangte a indaih lo chho mek. He harsatna chhawk zangkhai tur hian Manipur-a Catholic kohhran chuan Imphal-a Catholic Medical Centre (CMC) Hospital-ah khum 40 awmna, Covid-19 ward a siam dawn.

State sorkar chuan CWM Hospital-a Covid-19 ward siam tur hi a pawmsak tawh bawk a ni.

Archbishop of Imphal, Most Rev Dominic Luman DD chuan, hun harsa tak an tawh mekah, Pathian mite tan mahni leh midangte, khawvel himna tura theihtawp an chhuah a hun a ni tih sawiin, an thil tih tur chu hautak dawn hle mah se, theihtawp an chhuanh dawn tih a sawi.

CMC Hospital-a Covid-19 facility siam tur chu hman thuai a nih theihna turin sorkar chuan theihtawpa puih a tum thu a sawi. He hospital bakah hian Archdiocese hrang hranga wellness centre neih mek 12-te pawh Isolation/Covid Care Centre atan an siam dawn bawk a ni. Heng centre tinah hian trained nurse leh health assistant pakhat an awm sa vek a ni.

Kohhran hnuaia school building, hostel leh community hall hrang hrangte pawh a ṭul anga hman tura hawn an tum thu an sawi bawk. Catholic kohhran hian Manipur-a district 16-ah institution 45 a nei mek a ni.