Tripura-a CPI(M) MLA lakah thubuai ziak lut

Tripura-a eptu pawl, CPI(M) party MLA Bhanu Lal Saha chu social media lamah BJP chungchang mawi lo taka a sawi avangin police station hrang hrangah thubuai siamsak a ni.

Eptu MLA hian tunkar tir lam khan mipuite chu rorellai, BJP misual rualte chu tiang leh pipe hmanga dolet turin a ti a ni.

Law minister Ratan Lal Nath chuan state chhunga buaina a chhuak a nih chuan CPI(M) chu a mawhphurtu a ni dawn tih sawiin, Saha thuasawi mawi lo tak chu Assembly speaker Rebati Mohan Das pawh hriattir a ni tawh a ni, a ti.

Senior police officer chuan MLA hi an chhui mek thu sawiin, chhui chian a nih hnuah chauh hemi chungchanga information hi pekchhuah a ni dawn tih a sawi.

Hetih lai hian MLA Das chuan local TV channel pakhatin a kawmnaah a thusawi chungchang hi sawifiahin, an party member-te chu BJP mi leh saten kut thlaka an beih fo avangin, an sahimna tura lo do let tura a chahna a ni tih a sawi. "Ka thusawi avanga jail ka tang dawn a nih pawhin ka inpeih reng a ni," a ti.

Mahse minister Nath chuan CPI(M) hruaitute hian ruahmanna fel tak hmanga buaina chawh chhuak an ching a, hei hi kum 35 chhung Tripura-a ro an rel theihna pawh niin a puh.