Manipur : Imphal-a dawrkaite Covid-negative report nei vek turin hriattir
Manipur-a Covid-19 hri darh zel venna tur kawng khat atan, Imphal West district thuneitute chuan Imphal khawpui chhunga dawr kai, damdawi dawr pawh huam telin, June 8 hmaa Covid-19 negative report nei vek turin an hriattir.
Imphal West deputy commissioner Th Kirankumar chuan thupek tichhuakin, dawr kaite chu hri laka an him ngei a ngai tih a sawi a, hri darh zel tur venna atan theihtawp an chhuah a ṭul a ni, a ti.
June 8 hmain dawr kaite hian Covid-19 test hi an neih vek a ṭul thu leh, police leh thuneituten test report an phut hunah an nei hman ngei tur a ni a, test nei lote chu an dawr leh sumdawnna hmunte chu hawn phalsak an ni lo ang.
Manipur-ah hian hri kai hi an la pung zel a, Imphal West district hi hri leng tuar nasa district zingah a tel a ni.
Naupang pualin COVID care centre-ah khum 30 siam
Manipur chief minister N Biren Singh chuan kar liam ta Inrinni khan Imphal West district-a Canchipur-a Covid-19 care centre siam thar a hawng. He centre-ah hian khum 60 siam niin, heng zinga khum 30 chu hri kai, naupang kum 15 hnuai lam tan bik dah a ni.
Centre-ah hian oxygen concentrator pawh dah niin, doctor 15, nurse 21 leh staff dangten an vil ang.
CM chuan Covid-19 kai naupang nu leh pate a kawmnaah, naupang pual bika enkawlna hmun siam an duh thute an hrilh tih sawiin, tuna naupang pual bika khum 30 an dah thei ta chu lawmawm a tih thu a sawi.
Covid Care Centre siamna tura an hospital hmun hman tirtu, Iland Hospital chungah pawh CM chuan lawmthu a sawi. Hri leng thawh hnihna a rawn thlen tirh khan state chuan facility oxygen, ventilator leh ICU khum indaih lohna atawk chho a, mahse official hrang hrangte theihtawp chhuahna avangin an state chuan hri kaite enkawlna hmun leh hmanruate a nei ṭha tawk tawh a ni, a ti.
Hri kai na zualte enkawlna, ICU khum 40 vel chauh awm ṭhin kha tunah chuan khum 200 a awm tawh tih CM chuan a sawi a, JNIMS Hospital-ah pawh ICU khum 70 siam thar chu hman theih a ni thuai dawn tih a sawi bawk. District tina damdawi-inah ICU khum hi siam belh vek an tum tih a sawi.