Dimapur-ah khum 200 awmna acute care hospital siam dawn

Nagaland sorkar chuan Covid-19 hri kai an pun zel avanga ICU leh oxygen supported bed mamawhna pung zel avangin, Dimapur-ah khum 200 awmna acute care hospital a siam dawn.

Acute care hospital hi Christian Institute of Health Sciences and Research (CIHSR) ah siam a ni dawn a, hemi atana state sorkar chuan cheng vaibelchhe 30 a seng dawn a ni.

Health minister S Pangnyu Phom chuan hemi chungchang hi sawiin, acute care hospital an siam tur chu Covid-19 hri leng a kian hnuah pawh medical facility-ah hman chhunzawm zel a ni dawn tih a sawi.

A tira ruahmanna siamah chuan hospital-ah hian khum 176 siam tum a ni a, mahse khum 200 awm theihna tura tihlen niin, Pediatric ICU ward-ah khum 24 dah a ni ang.

State nodal officer for intergrated disease surveillance project, Dr Nyanthung Kikon chuan state chhunga Covid-19 hospital hrang hrangah non-oxygen bed 378, oxygen supported bed 535 leh ICU bed 101 a awm mek tih a sawi. Oxygen D Type cylinder 1,931, B Type 2,594, A Type 512 leh oxygen coincentrator 852 an kawl mek thu a sawi bawk.

Dimapur leh Kohima-a Pressure Swing Adsorption (PSA) plant-te chu hman an ni tawh a, Mokokchung-ah pawh siam zawh tawh niin, district dang pariatah pawh PSA plant hi siam a ni dawn tih Dr Kikon chuan a sawi.