Hri leng thawh thumna thleng tur atan Assam inbuatsaih : District hospital tinah naupang tan bik ICU siam dawn
Assam health minister Keshab Mahanta chuan Covid-19 hri leng thawh thumna thleng tur atan theihtawpin an inbuatsaih mek tih sawiin, medical college leh district hospital-ahte naupang enkawlna tur bik ICU te siam a ni dawn tih a sawi.
Chanchinthar lakhawmtute a kawmaah Keshab chuan, "State chhunga medical college-ahte paediatric ICU, khum 320 awmna siam a ni dawn a, heng zinga khum 60 chu Guwahati Medical College and Hospital-ah siam a ni ang," a ti.
Hei bakah hian Suilchar Mexcial College and Hospital leh Assam Medical College and Hospital (Dibrugarh)-ah naupang pual bikin ICU khum 40 ve ve; Jorhat Medical College and Hospital, Tezpur Medical College and Hospital, Fakhruddin Ali Ahmed Medical College and Hospital (Barpeta), Lakhimpur Medical College and Hospital leh Diphu Medical College and Hospital-ahte khum 30 ṭheuh siam a ni bawk ang.
Minister chuan, " Nagaon Civil Hospital-ah ICU khum 30 siam a ni ang a, district hospital tinah khum 10 siam vek a ni bawk ang," a ti. Hengte hi thla khat chhunga peih fel vek tum a nih thu a sawi bawk.
India ramah Covid-19 vaccine pek chhuah mek ni mah se, vaccine hi kum 18 hnuai lamte pek an la ni ve lo. Hei vang hian hri leng thawh thumna hi naupang lamin an tuar nat rin a ni a, state hrang hrangte hemi atan hian an lo inbuatsaih lawk mek a ni.
Private hospital-a hri kai enkawlna man bithliah
Assam sorkar chuan private hospital-a general ward leh super-specialty ward-a Covid-19 hri kaite enkawlna man a bithliah.
Health Minister chuan state chhunga private hospital hrang hrangte rate an zirchian hnuah, hri kaite enkawlna kawnga rate in ang lo thluah a awm lohna turin an bithliah tih a sawi. Rate siam hma hian private healthcare facility neitute chu ṭum hnih meeting an neihpui tih a sawi bawk.
Minister chuan super specialty hospital-a general ward-a Covid-19 hri kai enkawlna man chu ni khatah Rs 5,000 aiin a sang tur a ni lo tih sawiin, private hospital danga general ward-ah chuan ni khatah Rs 4,000 chin tura bithliah a ni tih a sawi. Super specialty hospital-a cabin-ah ni khatah Rs 6,500 chin, ICU-ah ventilator hman ngai lo chu Rs 10,000 leh ventilator hman ngai chu ni khatah Rs 15,000 a ni. General hospital-ah chuan cabin hman man chu ni khat Rs 5,000 chin, ICU-ah ventilator telloin Rs 9,000 leh ventilator hman telin Rs 12,000 chin a ni tur a ni ang. He rate siam hian registration, khum, ei tur, nursing charge, consultant charge, pathological test, X-ray leh USG te a huam tel dawn thung a ni.