Tripura-ah journalist beihna thubuai 24 ziak lut tawh

Tripura police-te chuan kum 2020 aṭang khan an state chhunga police station hrang hrangah journalist-te beih an nih chungchangah thubuai 24 ziah luh a ni tawh tih an sawi.

Assistant inspector general (AIG) of police (law and order) Subrata Chakraborty chuan thubuai ziahluh zinga pasarih hi kumina ziah a ni tih a sawi.

Chakraborty chuan Director General of Police (DGP) chuan media lamin journalist leh media mite beihna thleng fo chungchang leh, pawikhawihtute chunga police-ten action an la ṭha tawk lo nia sawi chungchangah district tina SP-te chu video conference kaltlangin review meeting a neihpui thu a sawi. Thubuai 24 ziah luh tawh zinga panga chu chhuizui mek an la ni tih a sawi bawk.

Police-te chuan kut tuartuten anmahni beitute an sawichian mai theih loh pawhin, pawikhawihtute zawnchhuah ngei tumin theihtawp an chhuah ṭhin tih an sawi. Pawikhawihtute chu Criminal Procedure Code hnuaiah kum sarih chuang tan theih te an nih thu a sawi bawk.

Hetihlai hian Assembly of Journalist (AoJ) media secretary Samrat Choudhury chuan thubuai ziakluh hi 29 chuang a ni zawk tih sawiin, heng zinga a tam zawk chu nikum September thlaa chief minister Bipbal Kumar Deb-a'n journalist-te vauna thu a sawi hnua thleng a ni tih a tarlang.