Nagaland : Lockdown avanga harsatna tawkte ngaihven turin phut
Nagaland-a eptu party, Naga People’s Front (NPF) chuan hri leng vanga state chhunga lockdown puan chhunzawm zel avanga mipuite harsatna tawh mek chu ngaihven thuai turin state sorkar an phut.
NPF chuan thuchhuah siamin, "Lockdown puan chhunzawm zel a nih avangin mi tam tak, a bikin mi rethei zawkten ei leh in lamah pawh harsatna an tawk nasa tawh. Hei vang hian sorkar chu heng mipuite harsatna chhawk zangkhai leh ṭanpui dan tur ngaihtuah a, ruahmanna siam thuai turin kan phut a ni," a ti.
Mipuite harsatna tawh mekah sorkar chu a ngawi reng nia sawiin; ei leh in, sum leh paia an harsatnate chhawk dan a ngaihtuah thuai loh chuan ei tur neiloa thite an awm thei mai dawn niin an sawi.
Hri len chhunga sorkar sum hman dante chhui chian an phut thu sawi bawkin, NPF chuan kum 2020/21 - 2021/22-a sorkarin fund a hmuh te, a hman chhuah dante chu mipui vantlang hmuh theih tura tichhuak turin an phut bawk.