Manipur-ah sakhaw hrang hrangten ṭawngṭaina hun hmang
Manipur-a sakhaw hrang hrang hruaituten Thawhṭanni khan Covid-19 hri leng mek laka venhimna leh damna dilin a huhoa ṭawngṭaina hun an hmang.
Ṭawngṭaina hun hi Imphal-a Kangla Fort-a western gate-ah neih a ni a, chief minister N Biren Singh-a'n a telpui.
CM chuan sakhaw hrang hrang hruaitute nena joint prayer session hun an hmang thei chu lawmawm a tih thu sawiin, sakhaw hruaitu hrang hrangte hi Covid-19 hri leng mek avanga harsatna an tawhte chhawk zangkhai a, venhimna leh awmpuina dilin lungrual takin an ṭawngṭai a ni, a ti.
Joint prayer session-ah hian Imphal Most Rev Dominc Lumon, Shree Shree Govindaji Temple Board-a puithiamte, All Manipur Christian Organisation, Jamiat-Ul-Ulema, Lainingthou Sanamahi Temple Board, Tingkao Ragwang Chapriak, Giani Gurudwara Prabandhak Committee, Shree Digambar Jain Samaj leh Kabui Poupei Chapriak Fom hruaitute an tel a ni.
Hripui leng chuan khawvel a tibuai mek a, Manipur pawh an bang lo tih sawiin CM chuan an state-a hri vanga thi chu 800 an chuang tawh a, hri kai mek pawh 9,000 chuang an awm thu a sawi.
Hun harsa tak an tawh mekah mipuite inlungrual a, inpumkhatna ṭha an neih a ṭul thu CM chuan a sawi a, hemi kawnga sakhaw hrang hrang hruaituten hma an hruai ṭhin chu lawmawm a tih thu a sawi bawk.