Board exam kalpui dan tur chungchangah Tripura sorkarin nu leh pate rawn dawn
Tripura sorkar chuan secondary leh higher secondary board examination neih leh neih loh tur chungchangah zirlai nu leh pate a rawn dawn. Nu leh pa te chu Tripura Board of Secondary Education website-ah an duhdan hrilh turin an ngen.
Education minister Ratan Lal Nath chuan June 8-15 chhungin nu leh pate ngaihdan hi lak a ni dawn tih a sawi a, "Zirlaite chungchang a nih vangin thutlukna siamna turah an nu leh pate ngaihdan hi a pawimawh a ni," a ti.
June 14 hian expert-te nen meeting an nei dawn tih Nath chuan a sawi bawk. He meeting-ah hian educationist, psychologist, journalist leh education minister hluite an tel dawn a, examination buatsaih leh buatsaih loh chungchanga an ngaihdante chuan thutlukna an siamna turah pawh a pui thei dawn tih minister chuan a sawi.
Education Minister chuan zirlai leh an nu leh pa ṭhenkhatte pawh a kawm thu sawiin, mahse tlemte ngaihdan ringawt chu thultlukna siamna turin a tawk lo a ni, a ti. Hei vang hian TBSE website kaltlanga nu leh pa tam zawk ngaihdan lakna tur hi an ruahman tih a sawi a ni. June 15 zan dar 6 thleng ngaihdan hi thehluh theih a ni ang a, hemi aṭang hian Tripura sorkar chuan thutlukna a siam tawh dawn a ni.
Assam-ah zirlaiten board exam cancel turin phut
Assam-a zirlaite chuan Pathianni aṭang khan Class X leh XII board exam cancel tura sorkar phutin Twitter-ah campaign an nei.
Assam-ah hian Class X exam hi
Assam-a Class 10 exam hi Board of Secondary Education Assam (SEBA)- in buatsaihin, Class XII exam hi Assam Higher Secondary Education Council (AHSEC)-in a buatsaih thung. May 11-a exam ṭan tur kha an ni a, mahse hri leng avangin sorkar chuan exam neih hun tur hi a sawn hl a, a ni tur erawh a la tifel lo.
Hri leng avanga sorkar laipuiin CBSE hnuai exam a cancel avang leh, state eng emaw zatin board exam hi an ṭhulh tawh bawk.
Eptu pawl, Congress party student wing, National Students' Union of India (NSUI) pawhin assam sorkar hnenah exam hi ṭhulh mai turin an ngen. Assam Pradesh Congress Committee president MP Ripun Bora chuan chief minister Himanta Biswa Sarma hnenah lehkha thawnin, exam chungchangah thutlukna siam thuai turin a ngen bawk.