PM-Kisan scheme hnuaia ṭanpuina State-a loneitu 8,967 chauhin an la dawng : Meghalaya MP

Meghalaya Congress MP Vincent H Pala chuan Pradhan Mantri Kisan Samman Nidhi (PM-KISAN) scheme hnuaia sum faia ṭanpuina chu an state-a loneitu 8,967 chauhin an la dawng tih a sawi. Hetih lai hian state mipui nuai 35 zinga 85%, nuai 29 chuang chu lo neia eizawng an nih thu a sawi bawk.

Prime minister Narendra Modi hnena lehkha thawnin, Pala chuan state chhunga loneitu harsa zawkte ṭanpuina tur fund hnianghnar taka pe turin a ngen. Loneitu tam ber hi tribal hnam niin, hri leng karah an chhungkua intunnunna tur ngaihtuahsak an ngai a ni, a ti.

"Meghalaya-a cheng zinga 85% chu loneitu an ni. Hetih lai hian sorkar laipui flagship programme, PM-Kisan scheme hnuaia loneitu 8,967 hnenah chauh ṭanpuina pek hi state chhunga loneitute chunga rorelna dik lo tak kalpuiin a ni," tiin MP chuan a sawi. PM-Kisan scheme hnuaia loneitu 8,967-te hnena ṭanpuina pek hi Rs 1,79,34,000 a ni a, hmarchhak state zingah pawh an dawng tlem ber niin a sawi.

May 14 khan PM Modi chuan PM-Kisan hnuaia loneitute ṭanpuina tur, a thawh riatna atan Rs vaibelchhe 20,000 chuang a pe chhuak a, hei hi ram chhung hmun hrang hranga loneitu vaibelchhe 9.5 chuang hnenah sem a ni. He scheme hmang hian sorkar laipui chuan loneitute vaibelchhe 14-te hnenah ṭanpuina, kum khatah Rs 6,000 ṭheuh a pe a, he pawisa hi thawh thumin, Rs 2,000 zelin sem an ni.