Tripura sorkarin MNGREGA hlawh pek tur Tihkhawtlai sakte zangnadawmna a pe dawn

Tripura sorkar chuan Mahatma Gandhi National Rural Employment Guarantee Act, 2005 (MGNREGA) hnuaia inhlawhte hlawh pek tur tihkhawtlai sakte chu zangnadawmna pek tel an ni dawn tih a sawi.

Chief minister Biplal Kumar Deb chuan zangnadawmna an pek tel tur hi hlawh pek chhuah tur tihkhawtlainaa mawhphurtu, officer leh thawktu dangte hlawh aṭangin pek an ni dawn tih a sawi bawk.

CM chuan, "Hlawh hi ni 15 chhunga pek a nih loh chuan, tihkhawtlai sak an nih chhung hian an hlawh lak tur pumpui aṭangin nitin 0.05% in a pung zel ang," a ti.

MNGREGA hnuaia inhlawhte hlawh pek dan chu sorkar chuan langtlang takin a kalpui zel dawn tih sawiin, state chhung hmun hrang hranga hnathawkte hlawh tihkhawtlai sak ṭhin awm pawh tihtawp tumin hma a la zel a ni, tiin CM chuan a sawi.

Nikum September 22 khan Tripura legislative assembly chuan state mipuite mamawh leh rawngbawl hna a hun taka thawh zelna tur ‘The Tripura Guaranteed Services to Citizens Act 2020’ a lo pass tawh a ni. He dan thar hmang hian mipuite mamawh pekna kawnga hna thawk ṭha lo leh tihkhawtlai saktu officer-te chu pawisa chawitir theih an ni.