NDFB hel inpete chhawmdawlna atan Rs vbc 160 pawm

Assam sorkar chuan National Democratic Front of Boroland (NDFB) hel inpe, mi 4,036-te chhawmdawlna atan cheng vaibelchhe 160 a pawm.

Chief minister Hi­man­ta Biswa Sarma hoa meeting neihah, NDFB hel inpete puala rehabilitation programme siam chungchang hi sawiin, hemi atana sum ruahman pawh hi an pawm a ni. He programme hnuaiah hian Bodoland Territorial Region (BTR) hmun hrang hranga hel inpe, mi 4,036-te hi skill development training neihpui an ni ang.

Kum 2020, January 27-a BTR Peace Accord ziah a nih hnua helpawl pali inpe zingah NDFB hi an tel a ni.

CM hoa meeting neihah hian minister for welfare of plain tribes and backward classes (only BTC) Urkhao Gwra Brahma, Chief Executive Member BTC (Bodoland Territorial Council) Promod Boro leh executive member eng emaw zat an tel.