Akhil Gogoi-a'n PM Modi hnenah ngenna thlen Nagaon, Cachar paper mill lilam tum duh lo

Assam independent MLA Akhil Gogoi chuan Assam-a paper mill hman zui loha awm pahnihte lilam tum chu duh loin, prime minister Narendra Modi hnenah hemi chungchang hi ngaihtuah ṭha leh turin a ngen.

PM Modi hnena lehkha a thawnah, Gogoi chuan Nagaon Paper Mill leh Cachar Papar Mill-te chu thuam tharin tichangtlung chho leh zawk turin a ngen a ni.

Akhil Gogoi chuan, "Bharatiya Janata Party chuan heng industry-te harsatna hi a lo hriatthiampui tawh hle a, April thla khan Assam-a BJP kaihhruai sorkar chuan paper mill rauhsan takte hi tuaithara, thil siamchhuah pawh tipung a, India ram hmun hrang hrangah thawndarh theih tura siamchhuah a lo tiam tawh a ni," a ti.

BJP intiamna chuan hnathawktute pawh a tilawm hman hle a ni a, hetih lai hian tun hnaiah paper mill pahnih lilam tum a nih thu thu tihchhuah a ni leh chuan an thu lo tiam tawhte a rawn thaichhe ta ta vek a ni, tiin Gogoi chuan a sawi.

Plant pahnihte hi oil leh tea sector bakah Assam sum leh pai lakluhna pawimawh tak a ni tih sawiin, PM Modi hnena paper mill pahnih lilam tumna chu ṭhulh a nih leh theihna atana ngaihtuah ṭha thuai turin a ngen a ni.

Panchgram-a Cachar Paper Mill-a hna thawh hi kum 2015, October 20 aṭang khan tihtawp a ni tawh a, Jagiroad-a Nagaon mill hi kum 2017, March 31 aṭang khan tihtawp a ni tawh bawk. Heng unit pahniha thawkte hlawh hi kum 2017 aṭang khan pek an ni tawh lo.