Pakke Tiger Reserve-a thawk 200 chuang an nuar

Arunachal Pradesh-a Pakke Tiger Reserve-a thawk mi 202-te chuan nikum December thla aṭanga hlawh an lak tawh loh avangin Nilaini aṭang khan tiam chin awm loin an nuar a, km 862-a zau tiger reserve hi vengtu awm loin a awm mek.

Hnathawktute hian thla ruk hlawh an la tawh lo tih sawiin, May 2-a nawrh huaihawt an tum chu state environment and forest minister Mama Natung-a'n an hlawhte pek chhuah a tiam avangin an ṭhulh tih an sawi. Mahse tun thlengin hlawh hi pek an la ni chuang lo tih sawiin, nawrh hi an huaihawt ta tih Pakke Tiger Reserve Workers Union general secretary Nikum Nabam chuan a sawi.

Tiger Reserve hi Pakke-Kessang district-a awm niin, state khawpui Itanagar aṭangin km 78-a hla a ni.

Union hian an hlawh pe tura an phut bakah, Special Tiger Protection Force (STPF)-te chu a ngheta dah a, kum 2018-a hlawh ennawn tawh anga thla khat an hlawh Rs 11,000-a tihsan leh, hlawh hi a hlawma pe loa thla tina pe ṭhin turin an phut.

National Tiger Conservation Authority (NTCA) chuan hnathawktute hlawh hi a pe a, an hlawh tur hi thla tina pe turin a khat tawkin a hlawmin state sorkar hnenah a pe mai ṭhin a ni.

NTCA hian April-November 2020 chhung atana hnathawktute hlawh hi a pek hnuah, 2020-2021 atan cheng vaibelchhe 6.05 sanction-in, heng zinga ṭhenkhat chu state sorkar hnenah a pe tawh. Nabam chuan kumin January khan NTCA hian an hlawh tur second installment, Rs vbc 1.32 chu state sorkar hnenah pe tawh mah se, tun thlengin sorkar hian an hlawh tur hi a la pe chhuak lo tih a sawi. Hun rei tak hlawh an lak tawh loh avangin hnathawktuten harsatna an tawk nasa tawh a, mi sum pek leh thawhkhawm hmang tein an khawsa tawh niin a sawi a ni.

Venthawn thilah Itanagar Zoo khar
Tun hnaiah Chennai-a Arignar Anna Zoological Park-a ramsa ṭhenkhat zingah Covid-19 hri kai hmuh chhuah an awm avangin, Arunachal Pradesh-a Biological Park (Itanagar Zoo) thuneitute chuan venthawn thilah Zoo hi an khar.

Itanagar deputy conservator of forests (wildlife and biodiversity) chuan thupek tichhuakin, mihring aṭangin ramsate hian Covid-19 hi an kai thei nia a lan avangin, Zoo hi tlawh theih lohin an khar tih a sawi.

Itanagar Biologicial Park hi hectare 250-a zau a ni a, Himalayan Black Bear, Royal Bengal Tiger, Great Indian Hornbill bakah khawvela sava vang tak takte hmuh tur an awm a ni. Khawvela sahuan zingah ramsa mang mai hlauhawm tawh, Hoolock gibbon pawh an awm a ni.