Assam HS Exam July-Aug ah buatsaih dawn
Assam Higher Secondary Education Council (AHSEC) hnuaia Class 12 board exam chu July-August thlaah neih a ni dawn.
AHSEC controller of examnation Pankaj Borthakur chuan state chhunga examination centre hrang hranga mawhphurtute hnenah hriattirna pein, exam neih hunah Covid19 protocol ṭha taka zawm a nih theihna turin exam-na tur hmun tam zawk buatsaih turin a hrilh.
Borthakur chuan centre in-charge-te hnenah hian, centre pakhatah candidate 400 aia tam an awm chuan, an bul hnai bera sorkar institution chu exam-na atan hian hmang tel turin a ti a ni.
Class 12 board exam hi May 11-a neih tura tih kha a ni a, mahse hri leng avangin exam hun hi sawn a ni. Hetih lai hian zirlaite chuan sorkar laipuiin CBSE hnuaia board exam a ṭhulh avang leh, state tam takin board exam an ṭhulh vangin state sorkar hnenah pawh exam hi ṭhulh ve mai turin an ngen. Mahse sorkar chuan board exam hi kaltlangpui a tum ta tho a ni.