Professional commando battalion 10 kan siam dawn : Assam CM

Assam chief minister Himanta Biswa Sarma an state-a pawikhawihna thleng ṭhin do let turin professional commando battalion 10 siam a ni dawn tih a sawi.

Kaziranga-a superin­tendent of police-te nena conference an neihah he thu hi CM chuan sawiin, pawikhawihna chi thar hrang hrang hmuhchhuah zel a nih avangin police force pawh tihchangtlun chhoh zel a ni dawn tih a sawi a ni.

CM chuan, "Profes­sional commando battalion 10 siam thar a ni dawn a, hetah hian civil police mi 23,000 leh commando police 12,000 dah an ni ang," a ti. Police force-a lak thar tur pawh hemi kawnga thiamna neite lak an nih theihna atan recruitment rules pawh siam danglam a nih tur thu a sawi bawk.

Sarma chuan police-te hna hautak zia pawh an hriatpui tih sawiin, an hah lutuk tur chhawk zangkhaina atan police station tinah two-shifts duty siam vek a ni dawn tih a sawi.