Nagaland-in June 18 thleng lockdown pawtsei

Nagaland High-Powered Committee (HPC) chuan district tina task force-te nen an sawiho hnuah, an state-a hri leng vanga lockdown puan mek chu ni sarih dang a pawtsei a, June 18 thleng a huam ang.

State sorkar thupuangtu, Mmhonlumo Kikon chuan lockdown hi pawtsei ni mah se, khuahkhirhna siam ṭhenkhat erawh thlahdul a ni dawn tih a sawi. District tina task force-te chuan an huam chhunga a ṭul dan angin thlahdulna hi an siam dawn a ni, a ti.

Hetih lai hian Naga Students' Federation (NSF) chuan lockdown pawhsei ni mah se, zirlaiten hmakhua thlirin stationery leh lehkhabu dawrte chu khar lo turin an ngen. SF president Kegwayhun Tep leh general secretary Supuni Ng Philo chuan Covid-19 fund hman danah sorkar chu langtlang taka kal turin an phut bawk.

Eptu party Naga People's Front (NPF) chuan lockdown avanga state mipui tam tak, a bikin mi harsa zawkte dinhmun chu ngaihven ṭha tura sorkar phutin, an harsatna chhawk zangkhai dan ngaihtuah turin a ti. Mipuite harsatna tawh mek ngaihven thuai a nih loh chuan ei tur nei lo, ṭam vangin an state chu a chhe vek thei mai dawn niin an sawi a ni.