Assam sorkarin hri vanga thi chhungte tan Covid Welfare Scheme a siam

Assam sorkar chuan an state chhunga Covid-19 hri vanga nu leh paten an thihsan fahrah leh, nupui/pasal chante chhawmdawlna tur welfafe scheme a siam.

Chief minister Himanta Biswa Sarma chuan he scheme, Mukhya Mantri Sishu Seva Yojana hmang hian hripui vanga nu leh pain an thihsan, fahrah 11 chu chhawmdawlna hi pe tawhin, June thla atan Rs 3,500 ṭheuh pek an nih bakah laptop pek ṭheuh an ni bawk tih a sawi. Heng naupangte tan hian fixed deposit-in Rs 7,81,200 dahsak an ni a, heta ṭang hian kum 24 an tlin hma chu thla tin Rs 3,500 pek an ni ang a, kum 24 an tlin hunah a hlawmin sum hi pek an ni ang.

CM chuan he chhawmdawlna dawng thei tur naupangte chu enfiah mek an ni tih sawiin, midang pawhin an dawng ve thei thuai dawn a ni, a ti.

Covid vanga fahrah ni tate bakah, hripui vanga nupui/pasal sunte chu Rs nuai 2.5 pek an ni dawn a, hei bakah hian thla tinin Arunoday Scheme hnuaiah Rs 830 - Rs 1,130 leh widow pension scheme aṭangin Rs 300 pek an ni ṭhin ang.

Sarma chuan state chhunga Covid vaccine pek chhuah hna kalpui mek chungchang pawh sawiin, August 15-ah chuan puitling chin chu vaccine dose khatna pek hman vek an tum tih a sawi.

Chief Minister's Relief Fund-ah Rs vaibelchhe 118 an dawn tawh thu sawiin, coporate lian Reliance leh Tata-ten sum tam tham tak an pek thu a sawi bawk. Sarma chuan, "Sum kan dawn tawh aṭangin vaccine leina atan Rs vbc 50 kan hmang tawh a ni, a bak hi fahrah leh nupui/pasal sunte chhawmdawlna atan hian kan hmang dawn bawk a ni," a ti. Chhawmdawlna pek turte hi thla tin ni 10-ah zel pawisa hi pek ṭhin an ni dawn tih a sawi bawk.

Sorkar laipuiin vaccine policy siam ṭha a, June 21 aṭanga state leh UT-te hnenah a thlawna a pek leh dawn avangin vaccine leina tura sum ruahman, Rs vbc 650 chu an hum thei dawn tih CM chuan a sawi a ni. Vaccine pek hna kalpui mekah state chhunga hri kai tam zualna, Guwahati, Dibrugarh, Tinsukia, Tezpurz, Cachar leh Nagaon-te chu ngaih pawimawh hmasak niin, hri darh zel tur danchah hi an tum tih a sawi.